Tariki Mein Zinda Rahna Hum Ko Nahin Manzur

Alam Khursheed

tariki men zinda rahna ham ko nahin manzur

jugnu sa tabinda rahna ham ko nahin manzur

ik pal ko hi chamken lekin bijli si lahra.en

raakh tale pa.inda rahna ham ko nahin manzur

naghma chheḌen saaz baja.en apne dil ka ham

mausam ka sa zinda rahna ham ko nahin manzur

ham azad parinde saari duniya apni hai

ḳhitte ka bashinda rahna ham ko nahin manzur

dast-o-gareban haal se hain ham farda raushan ho

maazi men raḳhshanda rahna ham ko nahin manzur

dil ke vasile se hi ham ne sab kuchh paaya hai

aql tira karinda rahna ham ko nahin manzur