na sham-e-gham na sub.h-e-mo’atabar huun
tamasha-e-jamal-e-dida-var huun
koi rut ho vahi be-barg-o-bari
zamin par ek be-mausam shajar huun
kahin ik lamha-e-guzran ka saaya
kahin a.inda sadiyon ka safar huun
huun harf-e-na-shunida be-suḳhan ko
shu.ur-e-dida-e-ahl-e-nazar huun
kabhi dil ka kabhi duniya ka matam
main apni zaat men ik chashm-e-tar huun
na ham-saya koi apna na darban
makan huun aur be-divar-o-dar huun
Leave a Reply