Manish Shukla
mohabbat ki faravani mubarak
tumhen ankhon ki tughyani mubarak
tumhara chand puura ho gaya hai
tumhen Thahra hua paani mubarak
utar aaya hai dil men nuur koi
tumhen chehre ki tabani mubarak
kisi par phir yaqin karne lage ho
tumhen phir se ye nadani mubarak
tum apni baat kahna jante ho
tumhen lafzon ki asani mubarak
tumhen ye shor-o-ghul nairang-e-duniya
hamen sahra ki virani mubarak
koi surat murattab ho rahi hai
ḳhayalon ki pareshani mubarak
Leave a Reply