ajiib bezar shakhs hai vo
use aqidat aziyyaton azmaishon se
vo sar pe duniya ka bojh daale
rivayaton ke liye havale
tamam himmat-ba-kaf diyanat
kuaan naya roz khodta hai
phir us men girta hai
gir ke khud ko nikalne ki muhim men din-rat katta hai
use mohabbat hai zaat ki gahri khaiyon se
kamal hairat hai us ne khud se kabhi na puchha
ye bojh kaisa utha rakha hai
hai is aziyyat men maslahat kya
qadam qadam khar-dar raste
ye dasht-o-dariya ye kohsaron ke silsile se
ye chhoti chhoti rukavaten ek phuul had tak
ye lamhe lamhe ki muskurahat ke muntazir log haspatalon men
meri ankhon se kyuun chhupe hain
ye mere khvabon se duur kyuun hain
sile hue un ke hont kyuun hain
kamal hairat hai us ne khud se kabhi na puchha
koi sada sarfarosh jazba
koi nida kyuun nahin bulati
ai dam-e-kulfat ke be-riya daimi sitam-kash
main muntazir huun
kabhi mujhe bhi tu aazma le
Leave a Reply