ishq a.ina-e-hairat ke siva kuchh bhi nahin
meri surat tiri surat ke siva kuchh bhi nahin
husn kahte hain jise ishq-o-mohabbat vaale
jauhar-e-chashm-e-basirat ke siva kuchh bhi nahin
daulat-e-qurb ho ya ne.amat-e-irfan-e-jamal
sirf ik ashk nadamat ke siva kuchh bhi nahin
hijr ho vasl ho ai dost adam ho ki vajud
ik tiri chashm-e-inayat ke siva kuchh bhi nahin
teri hasti ki nadamat ke siva sab kuchh hai
meri fitrat ki nadamat ke siva kuchh bhi nahin
husn-e-zahir ho ki ai aarzu husn-e-batin
zulf-e-idrak ki nik.hat ke siva kuchh bhi nahin
Leave a Reply