chup-chap se is dasht men zulmat ka saman hai
pathra.i hui aankh men sho.ala bhi kahan hai
sukhe hue patton ko jo raundo to sada den
piste hue insan ke munh men to zaban hai
azmat ki bulandi pe main jis samt gaya huun
dekha hai tire paanv ka pahle hi nishan hai
andhi jo chali saath uḌa le ga.i sab ko
kya janiye is dasht men ab kaun kahan hai
roken bhi to ‘ḳhavar’ use roka nahin jaata
jhonke pe mujhe umr-e-gurezan ka guman hai
Leave a Reply