hava-e-daur-e-mai-e-khush-gavar raah men hai
khizan chaman se hai jaati bahar raah men hai
gada-navaz koi shahsavar raah men hai
buland aaj nihayat ghubar raah men hai
adam ke kuuch ki lazim hai fikr hasti men
na koi shahr na koi dayar raah men hai
na badraqa hai na koi rafiq saath apne
faqat ina.yat-e-parvar-digar raah men hai
safar hai shart musafir-navaz bahutere
hazar-ha shajar-e-saya-dar raah men hai
maqam tak bhi ham apne pahunch hi jaenge
khuda to dost hai dushman hazar raah men hai
thaken jo paanv to chal sar ke bal na thahr ‘atish’
gul-e-murad hai manzil men khaar raah men hai
Leave a Reply