jahan bichhḌe the agar log vahan mil jaate
lauTne valon ko phir ghar ke nishan mil jaate
dil-navardon ka raha marhalon se ye shikva
jahan ummid thi ai kaash vahan mil jaate
mil gaya tum ko tumhara jahan ham ko apna
tum hamen milte to phir donon jahan mil jaate
ham ne piiri men phir is dil ko khangala hi nahin
sharm aati agar ehsas-e-javan mil jaate
ham se milne men tumhen aisi bhi mushkil kya thi
ham to sha.ir hain tumhen zer-e-zaban mil jaate
Leave a Reply