Jatinder Vir Yakhmi Jayaveer
muskurane ka yahi anjam hai
sab ke honTon par tira hi naam hai
thi kashish ki aap men hi kuchh kami
ghair pe kyuun be-vajah ilzam hai
ḳhat ka mazmun hai mire hi vaste
go lifafe par kisi ka naam hai
ḳhvab men bhi ye safar jaari rahe
zindagi avargi ka naam hai
log kyuun khul ke kabhi milte nahin
is shahar men har koi bad-nam hai
rutbe-dari ki lagi ik hoḌ hai
qabiliyyat bas bara.e naam hai
mai-kade se duur hi rahta huun main
tishnagi hi bas mira in.aam hai
jaam ho mahfil, na ho saaqi koi
ham ko apni be-ḳhudi se kaam hai
Leave a Reply