Darshan Singh
gulon pe ḳhak-e-mehan ke siva kuchh aur nahin
chaman men yad-e-chaman ke siva kuchh aur nahin
kahan ki manzil-e-rangin sahar to hone do
hamare ḳhvab thakan ke siva kuchh aur nahin
ye sham-e-ghurbat-e-dil hai yahan charagh kahan
ḳhayal-e-sub.h-e-vatan ke siva kuchh aur nahin
nigah-e-shauq-e-musalsal usi ko chheḌe ja
jabin pe jis ki shikan ke siva kuchh aur nahin
dayar-e-ishq men tum kyuun khaḌe ho ahl-e-havas
yahan to dar-o-rasan ke siva kuchh aur nahin
savad-e-sham-e-ḳhizan hai to ho hamen kya gham
nazar men sub.h-e-chaman ke siva kuchh aur nahin
kare talash junun zulmat-e-ḳhirad se kaho
junun kiran hai kiran ke siva kuchh aur nahin
hamari naghma-sara.i ke vaste ‘darshan’
hava-e-gang-o-jaman ke siva kuchh aur nahin
Leave a Reply