Nami Ansari
maana tiri nazar men tira pyaar ham nahin
kaise kahen ki tere talabgar ham nahin
sincha tha jis ko ḳhun-e-tamanna se rat-din
gulshan men us bahar ke haqdar ham nahin
ham ne to apne naqsh-e-qadam bhi miTa diye
lo ab tumhari raah men divar ham nahin
ye bhi nahin ke uThti nahin ham pe ungliyan
ye bhi nahin ke sahab-e-kirdar ham nahin
kahte hain rah-e-ishq men baḌhte hue qadam
ab tujh se duur manzil-e-dushvar ham nahin
janen musafiran-e-rah-e-arzu hamen
hain sang-e-mil raah ki divar ham nahin
pesh-e-jabin-e-ishq usi ka hai naqsh-e-pa
us ke siva kisi ke parastar ham nahin
Leave a Reply