afzal-ahmad-syed

Hamein Bhul Jaana Chahiye

us iint ko bhuul jaana chahiye

jis ke niche hamare ghar ki chabi hai

jo ek khvab men tuut gaya

hamen bhuul jaana chahiye

us bose ko

jo machhli ke kante ki tarah hamare gale men phans gaya

aur nahin nikalta

us zard rang ko bhuul jaana chahiye

jo suraj-mukhi se alahida diya gaya

jab ham apni dopahar ka bayan kar rahe the

hamen bhuul jaana chahiye

us aadmi ko

jo apne faaqe par

lohe ki chadaren bichhata hai

us ladki ko bhuul jaana chahiye

jo vaqt ko

davaon ki shishon men band karti hai

hamen bhuul jaana chahiye

us malbe se

jis ka naam dil hai

kisi ko zinda nikala ja sakta hai

hamen kuchh lafzon ko bilkul bhuul jaana chahiye

maslan

bani-nau-e-insan

More Poems

Leave a Comment