mere zaḳhmon miri rusvai ko vapas le le
is sulagti hui tanhai ko vapas le le
ilm aae na agar kaam kisi muflis ke
aa ke mujh se miri danai ko vapas le le
ya to sach kahne pe suqrat ko maare na koi
ya to sansar se sachchai ko vapas le le
chiḳh uTThe hain mire ghar ke ye ḳhali bartan
ab to bazar se mahngai ko vapas le le
ya to har samt ye dahshat ke nazare na dikha
ya miri ankhon se binai ko vapas le le
ya to insan ke har zaḳhm ko bhar de maula
ya to duniya se masihai ko vapas le le
shahid-e-jurm ho phir bhi na lahu khaul uThe
aise ḳhamosh tamashai ko vapas le le
bazm-e-batil men bhi himmat rahe haq-goi ki
ya miri taqat-e-goyai ko vapas le le
Leave a Reply