bane ho ḳhaak se to ḳhaksari ho tabi.at men
tabi.at aisi banti hai to banti hai mohabbat men
baha.e jaao aansu umr-bhar us ki mohabbat men
ki aise log moti ke mahal paate hain jannat men
kaha hazir men kuchh hujjat nahin phir mudda.a puchha
sitamgar ne palaT di baat ab hazir hai hujjat men
kisi se apne haq men kuchh suna bhi hai to jaane do
bura to badshah ko bhi kaha karte hain ghibat men
mohabbat ki zara si baat par itne ḳhafa kyuun ho
hua karti hain aḳhir saikḌon baten mohabbat men
nahin la sakta har ik kohkan farhad ki qismat
ḳhuda baḳhshe baḌa insan guzra chhoTi ummat men
tiri har ek tasvir ik ada-e-ḳhas rakhti hai
kare kya farq ab koi zarurat aur zinat men
ye kya saa.il ke munh par toḌ kar TukḌa sa rakh dena
are bande ḳhuda ko munh dikhana hai qayamat men
jo badle dost ka bhes us ko dushman kis tarah janon
gaya hazrat kalim-ullah ka naqqal jannat men
mohabbat be-ita.at ek dhoka hai mohabbat ka
mohabbat ka jo da.ava hai to koshish kar ita.at men
mohabbat aur mehnat kohkan ne ye bhi ki vo bhi
ulaT hai ek nuqte ki mohabbat aur mehnat men
safi’ duniya men jiine ka maza kuchh bhi nahin paaya
hamari umr kuchh ghaflat men guzri kuchh nadamat men
Leave a Reply