Anwar Masood
shikva-e-gardish-e-halat liye phirta hai
jis ko dekho vo yahi baat liye phirta hai
us ne paikar men na Dhalne ki qasam khaa.i hai
aur mujhe shauq-e-mulaqat liye phirta hai
shaḳhcha TuuT chuka kab ka shajar se lekin
ab bhi kuchh sukhe hue paat liye phirta hai
sochiye jism hai ab ruuh se kaise ruThe
apne saa.e ko bhi jo saat liye phirta hai
asman apne iradon men magan hai lekin
aadmi apne ḳhayalat liye phirta hai
partav-e-mahr se hai chand ki jhilmil ‘anvar’
apne kaase men ye ḳhairat liye phirta hai
Leave a Reply