Jameel Malik
har ghar ke as-pas samundar laga mujhe
kitna muhib shahr ka manzar laga mujhe
ḳhilqat bahut thi phir bhi koi bolta na tha
sunsan raston se bahut Dar laga mujhe
qatil ka haath aaj ḳhuda ke hai ru-ba-ru
dast-e-dua bhi ḳhuun ka saghar laga mujhe
yuun reza reza huun ki koi bhi hua na tha
yuun to tiri nigah ka kankar laga mujhe
baiThe-biTha.e kucha-e-qatil men le gaya
ma.asum dil bhi kitna sitamgar laga mujhe
kis kis ne chuTkiyon men uḌaya hai mera dil
chahe to tu bhi aḳhiri Thokar laga mujhe
gulchin palaT ke sab tire kuche se aa.e hain
phulon ke raste men tira ghar laga mujhe
vo jagta raha to qayamat bapa rahi
vo so gaya to aur bhi kafar laga mujhe
dekha jab aankh bhar ke use Dubta gaya
aalam tamam alam-e-digar laga mujhe
us ki ḳhamoshiyon men nihan kitna shor tha
mujh se siva vo dard ka ḳhugar laga mujhe
jis aa.ine men bhi tira paikar sama gaya
us aa.ine men apna hi jauhar laga mujhe
ya mere dil se hasrat-e-parvaz chhin le
ya mere paas aa ke na.e par laga mujhe
sahil pe jo khaḌa tha tamasha bana hua
vo gahre paniyon ka shanavar laga mujhe
socha to chuur chuur the shishe ke ghar tamam
dekha to haath haath men patthar laga mujhe
a.ankhon se gard jhaaḌ ke dekha to dosto
kotah qad bhi apne barabar laga mujhe
tarikiyon men nuur ka haala bhi tha kahin
dasht-e-ḳhayal apna muqaddar laga mujhe
chheḌi kuchh is tarah se ‘jamil’ us ne ye ghazal
har ek sher qand-e-mukarrar laga mujhe
Leave a Reply