Abdul Ahad Saaz
aaj phir shab ka havala tiri janib thahre
chand mazmun bane sharh-e-kavakib thahre
dad-o-tahsin ki boli nahin tafhim ka naqd
shart kuchh to mire bikne ki munasib thahre
nek guzre miri shab sidq-e-badan se tere
gham nahin rabta-e-sub.h jo kazib thahre
mukhlisi bais-e-taz.hik zehanat dushman
ye mahasin to mire haq men maaib thahre
main huun khud se mutaqabil mutabadil mutazad
ruuh thahre mira unvan kabhi qalib thahre
baat hi dil ke juda hon to bhala kaun akhir
kis ka ham-vazn ba-mizan-e-matalib thahre
Leave a Reply