Mumtaz Ahmad Khan Khushtar
nazr-e-tauba ham karenge mai-parasti ek din
DhunDhti rah ja.egi ye bazm-e-masti ek din
gham na kar ḳhushiyan na a.engi to gham aa ja.enge
bas hi ja.egi kisi se dil ki basti ek din
yuun guzari ham ne to apni do-roza zindagi
mai-parasti ek din ki faqa-masti ek din
husn ki ye garm-bazari rahegi ta-ba-kai
dekhna ho ja.engi ye jins sasti ek din
apni nadani ye nazan hain bahut ahl-e-ḳhirad
un ko le Dubegi un ki ḳhud-parasti ek din
hai jabhi se be-ḳhudi badmast huun sarshar huun
un ke hathon se piya tha jam-e-masti ek din
Thokaren khata rahega toḌ kar baiThega paanv
ḳhatm ho ja.egi teri sair-e-hasti ek din
bach ke ja.engi kahan hasti shikast-o-reḳht se
sar-bulandi ke muqaddar men hai pasti ek din
dekh zalim ki hua karti nahin rassi daraz
asman rah ja.egi ye chira-dasti ek din
miTte miTte saaf miT ja.enge ye naqsh-o-nigar
ḳhud ayaan ho kar rahega raz-e-hasti ek din
TuTne vaala hai naata us se TuTega zarur
chhuTne vaali hai ‘ḳhushtar’ bazm-e-hasti ek din
Leave a Reply