kitni rangin hai faza kitni hasin hai duniya
kitna sarshar hai zauq-e-chaman-arai aaj
is saliqe se sajai gai bazm-e-giti
tu bhi divar-e-ajanta se utar aai aaj
ru-numai ki ye saaat ye tahi-dasti-e-shauq
na chura sakta huun ankhen na mila sakta huun
pyaar saughat, vafa nazr, mohabbat tohfa
yahi daulat tire qadmon pe luta sakta huun
kab se takhil men larzan tha ye nazuk paikar
kab se khvabon men machalti thi javani teri
mere afsane ka unvan bani jaati hai
dhal ke sanche men haqiqat ke kahani teri
marhale jhel ke nikhra hai mazaq-e-takhliq
sai-e-paiham ne diye hain ye khad-o-khal tujhe
zindagi chalti rahi kanton pe, angaron par
jab mili itni hasin, itni subuk chaal tujhe
tere qamat men hai insan ki bulandi ka vaqar
dukhatar-e-shahr hai, tahzib ka shahkar hai tu
ab na jhapkegi palak, ab na hatengi nazren
husn ka mere liye akhiri meaar hai tu
ye tira paikar-e-simin, ye gulabi saari
dast-e-mehnat ne shafaq ban ke udha di tujh ko
jis se mahrum hai fitrat ka jamal-e-rangin
tarbiyat ne vo latafat bhi sikha di tujh ko
agahi ne tiri baton men khilain kaliyan
ilm ne shakkarin lahje men nichode angur
dilrubai ka ye andaz kise aata tha
tu hai jis saans men nazdik usi saans men duur
ye latafat, ye nazakat, ye haya, ye shokhi
sau diye julte hain umdi hui zulmat ke khilaf
lab-e-shadab pe chhalki hui gulnar hansi
ik baghavat hai ye ain-e-jarahat ke khilaf
hausle jaag uthe soz-e-yaqin jaag utha
nigah-e-naz ke be-nam isharon ko salam
tu jahan rahti hai us arz-e-hasin par sajda
jin men tu milti hai un rah-guzaron ko salam
aa qarib aa ki ye juuda main pareshan kar duun
tishna-kami ko ghataon ka payam aa jaae
jis ke mathe se ubharti hain hazaron subhen
miri duniya men bhi aisi koi shaam aa jaae
Leave a Reply