Firaq Gorakhpuri
dete hain jam-e-shahadat mujhe maalum na tha
hai ye ain-e-mohabbat mujhe maalum na tha
matlab-e-chashm-e-muravvat mujhe maalum na tha
tujh ko mujh se thi shikayat mujhe maalum na tha
chashm-e-khamosh ki babat mujhe maalum na tha
ye bhi hai harf-o-hikayat mujhe maalum na tha
ishq bas men hai mashiyyat ke aqida tha mira
us ke bas men hai mashiyyat mujhe maalum na tha
haft-khvan jis ne kiye tai sar-e-rah-e-taslim
tuut jaati hai vo himmat mujhe maalum na tha
aaj har qatra-e-mai ban gaya ik chingari
thi ye saaqi ki shararat mujhe maalum na tha
nigah-e-mast ne talvar utha li sar-e-bazm
yuun badal jaati hai niyyat mujhe maalum na tha
gham-e-hasti se jo bezar raha main ik umr
tujh se bhi thi use nisbat mujhe maalum na tha
ishq bhi ahl-e-tariqat men hai aisa tha khayal
ishq hai pir-e-tariqat mujhe maalum na tha
puchh mat sharh-e-karam-ha-e-azizan hamdam
un men itni thi sharafat mujhe maalum na tha
jab se dekha hai tujhe mujh se hai meri an-ban
husn ka rang-e-siyasat mujhe maalum na tha
shakl insan ki ho chaal bhi insan ki ho
yuun bhi aati hai qayamat mujhe maalum na tha
sar-e-mamura-e-alam ye dil-e-khana-kharab
mit gaya teri badaulat mujhe maalum na tha
parda-e-arz-e-vafa men bhi raha huun karta
tujh se main apni hi ghibat mujhe maalum na tha
naqd-e-jan kya hai zamane men mohabbat hamdam
nahin milti kisi qimat mujhe maalum na tha
ho gaya aaj rafiqon se gale mil ke juda
apna khud ishq-e-sadaqat mujhe maalum na tha
dard dil kya hai khula aaj tire ladne par
tujh se itni thi mohabbat mujhe maalum na tha
dam nikal jaae magar dil na lagae koi
ishq ki ye thi vasiyyat mujhe maalum na tha
husn valon ko bahut sahal samajh rakkha tha
tujh pe aaegi tabiat mujhe maalum na tha
kitni khallaq hai ye nisti-e-ishq ‘firaq’
us se hasti hai ibarat mujhe maalum na tha
Leave a Reply