Bais-E-Rahat-E-Dil Mera Muqaddar Nikla

bā.is-e-rāhat-e-dil merā muqaddar niklā

jis ko samjhā thā bayābāñ vo mirā ghar niklā

husn-e-ma.asūm kī taqdīs ko rusvā na kiyā

jitnā ilzām hai ḳhush huuñ ki mire sar niklā

hai sabab rū-e-munavvar mirī barbādī kā

haath aayā thā jo yāqūt vo patthar niklā

dars lo himmat-e-ālī se mirī dīvāno

maiñ vo dāman huuñ jo kāñToñ se ulajh kar niklā

luT gayā manzil-e-maqsad pe pahuñch kar afsos

rahnumā jis ko maiñ samjhā thā sitamgar niklā

zulmat-e-shab huī kāfūr yakāyak ‘sāhil’

matla.a-e-sub.h se jab mehr-e-munavvar niklā

Leave a Comment