ba.is-e-rahat-e-dil mera muqaddar nikla
jis ko samjha tha bayaban vo mira ghar nikla
husn-e-ma.asum ki taqdis ko rusva na kiya
jitna ilzam hai ḳhush huun ki mire sar nikla
hai sabab ru-e-munavvar miri barbadi ka
haath aaya tha jo yaqut vo patthar nikla
dars lo himmat-e-ali se miri divano
main vo daman huun jo kanTon se ulajh kar nikla
luT gaya manzil-e-maqsad pe pahunch kar afsos
rahnuma jis ko main samjha tha sitamgar nikla
zulmat-e-shab hui kafur yakayak ‘sahil’
matla.a-e-sub.h se jab mehr-e-munavvar nikla
Leave a Reply