Jameel Malik
jurm tera na sahi meri saza ḳhuub sahi
a.ina-ḳhana-e-hasti ki ada ḳhuub sahi
paas se to tiri ankhon ke bhanvar le Duube
duur se jalva-e-girdab-e-bala ḳhuub sahi
kaisa savan hai ki jo khul ke barasta hi nahin
dekhne men tiri zulfon ki ghaTa ḳhuub sahi
ghar men jo baat hai vo tere shabistan men kahan
jan-e-yaran tere kuche ki hava ḳhuub sahi
zauq-e-jalvat men tab-o-tab-e-haqiqat bhi to hai
shauq-e-ḳhalvat-kada-e-saz-o-sada ḳhuub sahi
din ko sahra men bagulon ka safar bhi dekho
sub.h-dam baagh men ye raqs-e-saba ḳhuub sahi
sar-zaminen hain bahut ruuh ke patal men bhi
mah-o-mirriḳh pe avaz-e-dara ḳhuub sahi
dost zindan-e-anasir se riha.i ma.alum
dasht-e-imkan-e-taḳhayyul ki faza ḳhuub sahi
vus.aten aur bahut hain gham-e-dauran ke liye
qibla-e-jan ke liye qibla-numa ḳhuub sahi
ḳhub-tar hai miri taz.in se har paikar-e-jan
teri taḳhliq ka har naqsh-e-baqa ḳhuub sahi
paanv men apna hi saaya hai pareshan ‘jamil’
sar pe dastar-e-par-o-bal-e-huma ḳhuub sahi
Leave a Reply