Kya Bad-Gumaniyan Hain Meri Jaan Lijiye

kya bad-gumaniyan hain miri jaan lijiye

ye dil to hai vahi ise pahchan lijiye

ham se to ye kabhi nahin hone ka naseho

suniye tumhari baat ko aur maan lijiye

ne aish ki talab hai na ishrat ki aarzu

ai charkh kis liye tira ehsan lijiye

gar hukm ho to kaat ke sar aage la rakhun

lene ka is ke rakhiye na arman lijiye

aaya huun tang shahr men vahshat ke haath se

ji chahta hai rah-e-bayaban lijiye

gar imtihan-e-ishq ho manzur to abhi

karta huun main niyaz dil o jaan lijiye

munh dekh nau-khaton ka yahi aae hai khayal

de kar ke naqd-e-jan ye quran lijiye

Leave a Comment