Aalam Mein Husn Tera Mashhur Jaante Hain

aalam men husn tera mashhur jante hain

arz o sama ka us ko ham nuur jante hain

har-chand do jahan se ab ham guzar gae hain

tis par bhi dil ke ghar ko ham duur jante hain

jis men tiri raza ho vo hi qubul karna

apna to ham yahi kuchh maqdur jante hain

sau rang jalvagar hain garche butan-e-alam

ham ek tujhi ko apna manzur jante hain

labrez-e-mai hain garche saghar ki tarah har dam

tis par bhi aap ko ham makhmur jante hain

kuchh aur aarzu ki hargiz nahin samai

az bas tujhi ko dil men mamur jante hain

‘iman’ jis ke dil men hai yaad us ki har dam

ham to usi ki khatir masrur jante hain

Leave a Comment