Bujh Rahi Hai Aankh Ye Jism Hai Jumud Mein

bujh rahī hai aañkh ye jism hai jumūd meñ

ai makīn-e-shahr-e-dil aa mirī hudūd meñ

paḌ ga.ī darāḌ sī kyā darūn-e-dil kahīñ

aa ga.ī shikastagī kyuuñ mire vajūd meñ

ḳhvāhish-e-qadam ki hoñ us taraf hī gāmzan

dil kī aarzū rahe us kī hī quyūd meñ

rañg kyā ajab diyā merī bevafā.ī ko

us ne yuuñ kiyā ki mere ḳhat jalā.e uud meñ

tū ne jo diyā hameñ us se baḌh ke deñge ham

bevafā.ī asal zar nafratoñ ko suud meñ

bām-e-intizār par dekhtā huuñ do diye

jhāñktā huuñ jab kabhī raftagāñ ke duud meñ

Leave a Comment