Tahir Adeem
bujh rahi hai aankh ye jism hai jumud men
ai makin-e-shahr-e-dil aa miri hudud men
paḌ ga.i daraḌ si kya darun-e-dil kahin
aa ga.i shikastagi kyuun mire vajud men
ḳhvahish-e-qadam ki hon us taraf hi gamzan
dil ki aarzu rahe us ki hi quyud men
rang kya ajab diya meri bevafa.i ko
us ne yuun kiya ki mere ḳhat jala.e uud men
tu ne jo diya hamen us se baḌh ke denge ham
bevafa.i asal zar nafraton ko suud men
bam-e-intizar par dekhta huun do diye
jhankta huun jab kabhi raftagan ke duud men
Leave a Reply