Raheel Farooq
ham tire ishq pe maghrur na ho jaa.en kahin
is qadar paas na aa duur na ho jaa.en kahin
hamen a.ina bana le ki ye sahir ankhen
apne hi sehr se mas.hur na ho jaa.en kahin
siina tabut na ban jaa.e kisi bulbul ka
ḳhushbuen baagh ki kafur na ho jaa.en kahin
mat hansa is qadar ai naubat-e-halat hamen
jo faqat zaḳhm hain nasur na ho jaa.en kahin
dhaḌkanen kya hain bas ik raakh men larzish si hai
phir vahi jalve sar-e-tur na ho jaa.en kahin
jugnuon ko to biTha leti hai ankhon pe hava
diye Darte hain ki be-nur na ho jaa.en kahin
zarre zarre men to vo ḳhud hai makin varna ham
chhup na jaa.en kahin mafrur na ho jaa.en kahin
azma.ish men na Daal apne labon ko mat bol
furqaten bhi hamen manzur na ho jaa.en kahin
ham to ashiq hain hamara to chalo kaam sahi
sajde is shahr ka dastur na ho jaa.en kahin
aap ke ishq men ham ho to ga.e aap hi aap
aap ke naam se mash.hur na ho jaa.en kahin
ishq ko hazrat-e-‘rahil’ samajhte to hain jabr
qibla-o-ka.aba bhi majbur na ho jaa.en kahin
Leave a Reply