jis tarah haath ki chuḌi ka khanakna tai hai
Thiik vaise hi mire dil ka dhḌakna tai hai
lauT aa.e hain tujhe ghair ki qismat kar ke
aaj ki raat to ankhon ka chhalakna tai hai
kaifiyat dil ki agar tu ne dikha.i mujh ko
a.ine phir to mira tujh pe bhaḌakna tai hai
main ne alfaz nahin dard piro rakhe hain
ye ghazal sun ke miri jaan sisakna tai hai
be-hisi ne to bana Daala tha patthar mujh ko
is tabassum se to anchal ka Dhalakna tai hai
kuchh ḳhabar bhi hai tujhe dil ko jalane vaale
zaḳhm khilte hain to phir un ka mahakna tai hai
Leave a Reply