na mire paas izzat-e-ramazan
na kabhu ki ibadat-e-ramazan
dushman-e-aish ka main dushman huun
go ki the farz hurmat-e-ramazan
mujh ko masjid se kaam nahin illa
sunne jaata huun rukhsat-e-ramazan
shaikh rota hai apni rozi ko
ki na az-bahr-e-furqat-e-ramazan
kuchh na hasil hua kisi ke taiin
ghair faaqa badaulat-e-ramzan
zahid-e-khushk ke taiin dekhe
yaad aati hai surat-e-ramazan
mere ham-mashrabon men aa ‘taban’
rijhte honge hazrat-e-ramazan
Leave a Reply