Yasmeen Hameed
qayas-o-yas ki had se nikal kar
chali ja.un kahin chehra badal kar
uḌegi raakh phir meri hava men
subuk-raftar ho ja.ungi jal kar
main suraj ke ta.aqub men rahungi
tulu-e-sub.h ho ja.ungi Dhal kar
tilism-e-mehr-o-mah ko toḌ Daale
zamin apni hararat se pighal kar
abhi pahla qadam tai kar rahi huun
dobara gir paḌi thi main sambhal kar
rahen phulon bhare raste salamat
safar kaTungi angaron pe chal kar
mire attar ne ḳhushbu bana.i
bahut ma.asum phulon ko masal kar
Leave a Reply