jab koi gham hi na ho ashk baha.un kaise
ḳhud ko duniya ki adakari sikha.un kaise
teri har ek jhalak aur baḌhati hai talab
aise men pyaas nigahon ki bujha.un kaise
ḳhud-baḳhud ankhon ke paimane chhalak paḌte hain
shiddat-e-gham ko chhupa.un to chhupa.un kaise
chand-taron se zara bhi tujhe taskin nahin
zindagi ab main tiri maang saja.un kaise
jis ko aane ki tasavvur men bhi fursat na mile
hal-e-dil us ko suna.un to suna.un kaise
bach ke duniya ki nigahon se ḳhata kar to luun
apni nazron se magar ḳhud ko gira.un kaise
aag ho to use paani se bujha bhi luun ‘jigar’
ye lagi dil ki hai main us ko bujha.un kaise
Leave a Reply