ye jang vo hai ki ab khud bhi harna chahun
magar main is ke liye bhi tiri raza chahun
mire ghulam mire aine utha laana
ki main is aag ko paani men dekhna chahun
main shakh shakh tiri nikhaten fuzun dekhun
main taaq taaq tiri raushni sava chahun
ata hua tiri khushbu se pairahan rakhkhun
bhare hue tire rangon men dast o pa chahun
tamam shahr khamoshi ki niind soya hai
main aise vaqt men ik khanjar-e-nava chahun
jo khema-gah se niklun to qatl-gah talak
pata hua tire aaza se rasta chahun
main ahd-nama-e-tanhai lene aai huun
fasil-e-hijr ka ik ek baab va chahun
miri ridaen kanizon men baant diin jis ne
kharaj-e-saya-e-divar us se kya chahun
Leave a Reply