shikoh-e-zat se dushman ka lashkar kaanp jaata hai
agar kirdar puḳhta ho sitamgar kaanp jaata hai
tasavvur men ubharta hai kabhi jab qabr ka manzar
uchaT jaati hain ninden aur bistar kaanp jaata hai
mile hain zaḳhm kuchh aise mujhe apne rafiqon se
ka.i barson ke kuchh rishton ka mehvar kaanp jaata hai
kisi bhi jang men koi shahadat ki ḳhabar sun kar
sisak uThte hain kangan aur zevar kaanp jaata hai
vo haidar murtaza bhi hain vahi sher-e-ḳhuda bhi hain
vahi ik naam sun ke ab bhi ḳhaibar kaanp jaata hai
chale aate hain kuchh yuun be-saliqa log maiḳhane
surahi rone lagti hai to saghar kaanp jaata hai
vahi be-ḳhauf rahta hai sada ‘shayan’ duniya men
ḳhuda ke ḳhauf se dil jis ka akasr kaanp jaata hai
Leave a Reply