Na Wo Nalon Ki Shorish Hai Na Ghul Hai Aah-O-Zari Ka

Meer Mehdi Majrooh

na vo nalon ki shorish hai na ghul hai ah-o-zari ka

vo ab pahla sa hangama nahin hai be-qarari ka

talab kaisi bulana kya vahan khud ja pahunchte hain

agar aalam yahi chande raha be-akhtyari ka

vahan vo naz-o-ishve se qadam gin gin ke rakhte hain

yahan is muntazir ka vaqt pahuncha dam-shumari ka

kabhi chashm-e-khumar-alud ki masti nahin dekhi

baja hai hazrat-e-naseh ko daava hoshiyari ka

bhala kya aisi roti shakl paas aa kar koi baithe

uthe akhir vo jhunjhla kar bura ho ashk-bari ka

ajab kya hai ki qasid bhuul jaae us ka le jaana

likhun jis naame men shikva tiri ghaflat-shiari ka

misal-e-nakhl dekha hai usi ko phulte-phalte

kiya jis shakhs ne hasil tariqa khaksari ka

har ik shai ka hai andaza magar payan nahin hargiz

tiri ghaflat-shiari ka miri ummid-vari ka

zi-bas ankhon men rangat chha rahi hai lala-o-gul ki

khizan men lutf aata hai hamen fasl-e-bahari ka

kabhi sar paanv par rakhna kabhi qurban kah uthna

hamen thoda sa dhab aata to hai matlab-barari ka

chhupa kal gosha-e-mai-khana men ‘majruh’ ne dekha

yunhi shohra suna tha shaikh ki parhez-gari ka