jab bhi tumhari yaad ki aahaT mujhe mili
tanha.i kanpti hui mujh se juda hui
avaz de ke kis ko bula.un men apne paas
zulmat ki chaar so mire divar uTh ga.i
vo log itni der men kis samt ko ga.e
sahil pe aa chuka tha safina abhi abhi
hain sho.ala-bar taron ki ankhen na jaane kyuun
jhulsa rahi hai jism ko kyuun aaj chandni
ham apne dil ka haal suna.en kise yahan
lagta hai saara shahr hamen shams’ ajnabi
Leave a Reply