Poet
kis darja mire shahar ki dilkash hai faza bhi
manus har ik chiiz hai miTTi bhi hava bhi
dekho to har ik rang se milta hai mira rang
socho to har ik baat hai auron se juda bhi
yuun to mire halat se vaqif hai zamana
lekin mujhe milta nahin kuchh apna pata bhi
saa.e ki tarah saath raha karta hai ik shaḳhs
saaya ki hua karta hai apnon se juda bhi
phir zaḳhm-e-tamanna ke na.e phuul khile hain
ḳhushbu tiri le aa.i hai phir mauj-e-saba bhi
har aan badalti hui duniya hai ye ‘nadir’
yaan dil ke lagane ki nahin hai koi ja bhi
Leave a Reply