tarikiyon men ham jo giraftar ho ga.e
shayad sahar se pahle hi bedar ho ga.e
ye kaun sa maqam-e-rah-o-rasm hai ki vo
itne hue qarib ki bezar ho ga.e
manzil ki samt tujh ko na le ja.enge kabhi
vo raste jo aap hi hamvar ho ga.e
nakamiyon ne aur bhi sarkash bana diya
itne hue zalil ki ḳhuddar ho ga.e
ab ke to nok-e-ḳhar bhi gul-rang ho chali
kal dekhna ki dasht bhi gulzar ho ga.e
‘nuri’ hamen jahan men masarrat ki thi talash
aḳhir har ek shaḳhs ke gham-ḳhvar ho ga.e
Leave a Reply