Jafa-Pasandon Ko Sunte Hain Na-Pasand Hua

jafa-pasandon ko sunte hain na-pasand hua

ab aur bhi dil-e-mayus dard-mand hua

mah-e-do-hafta banaya hamin ne aariz ko

hamari vajh se husn aap ka do-chand hua

juda juda hai mazaq apna apna duniya men

hamen jo dard to dil dard ko pasand hua

vo pher pher gae tod tod kar aksar

ye dil vo hai jo kai baar dard-mand hua

koi hazar kahe apni hi ye karta hai

hamara dil na hua koi khud-pasand hua

habab ka ye ishara hai ahl-e-ghaflat se

hua vo past jo duniya men sar-buland hua

hua hai ishq men kam husn-e-ittifaq aisa

ki dil ko yaar to dil yaar ko pasand hua

hila diya sar-e-bam aaj ja ke dil un ka

asar ko nala-e-qalb-e-hazin kamand hua

dikhaya dil ko ye din kibr-o-be-niyazi ne

ki naaz utha ke kisi ke niyaz-mand hua

ye kaun dilbar-e-nazuk-mizaj se puchhe

pasand bhi dil-e-zeba-e-dard-mand hua

Leave a Comment