aur mujh sa jaan dene ka tamannai nahin
us ka shaidai huun jis ka koi shaidai nahin
saaf hain ham go tujhe mail-e-khud-arai nahin
dil vahi aina hai par tu tamashai nahin
qail-e-vahdat huun shirkat ka tamannai nahin
tu jo tanha hai to mujh ko fikr-e-tanhai nahin
naseho kyuun sabr karne ke liye karte ho tang
is qadar dil tang hai ja-e-shakebai nahin
dhundhne par main kamar bandhun to paun qasr-e-yar
be-mahal hai la-makan kahna vo harjai nahin
sach hai haq na-haq nahin milta kisi ko martaba
daar par mansur ko auj-e-masihai nahin
ya karo apna kisi ko ya kisi ke ho raho
chaar din ki zindagi men lutf-e-tanhai nahin
zaar huun taqat se mil jaane ko taqat chahiye
na-tavani se judai ki tavanai nahin
dasht-e-vahshat men nahin milta hai saaye ka pata
main huun saudai mira ham-zad saudai nahin
atshi shishe ki ainak ho hamari aankh men
ham tumhari garmiyan dekhen ye binai nahin
misr ke bazar men kya badh gai yusuf ki qadr
husn ko be-pardagi men aib-e-rusvai nahin
be-mai-o-mai-khana-o-saqi jo aai mujh ko maut
halqa-e-matam hai daur-e-charkh-e-minai nahin
ho gaya khamosh jo shahr-e-khamoshan ka hua
hai dahan-e-gor maujud aur goyai nahin
donon nashaon se hain bahar mast-e-sahba-e-alast
apne mai-khane men daur-e-charkh-e-minai nahin
paaen kya divana-e-mizhgan but-e-tarsa men lutf
sozan-e-isa men nok-e-khak-e-shahrai nahin
mere dil ki tujh ko beja hai shikayat ghair se
apne ghar ka haal kahna tarz-e-danai nahin
nashshe men zinda hain hai isa-nafas apna khumar
jaan aaza men chali aati hai angdai nahin
ho gae tedhe agar ham ne jagaya niind se
aap dar-parda akadte hain ye angdai nahin
mai-kade par saqf-e-abr-e-rahmat-e-haq chahiye
ehtiyaj-e-saeban-e-charkh-e-minai nahin
be-khatar hain susti-e-andam se nazuk-mizaj
justuju-e-bada men shishon ki angdai nahin
sar ko takra kar mitaya apni qismat ka likha
dair men kaabe men ab fikr-e-jabin-sai nahin
aap se yusuf hazaron ham se ashiq saikdon
husn ka toda nahin qaht-e-tamashai nahin
pir-e-gardun se zara anjum uchak kar chhin len
himmaten aali hain fikr-e-charkh-e-balai nahin
hai mira dasht-e-junun saat asmanon se do-chand
rub-e-maskun vadi-e-vahshat ki chauthai nahin
dukhtar-e-raz misl-e-aflatun hai jab tak khum men hai
nashshe men apne se bahar hon ye danai nahin
lucknow ki aarzu men jaan deta hai ‘munir’
saltanat ka bhi zamane men tamannai nahin
Leave a Reply