rag-e-ehsas men nashtar TuuTa
haath se chhuT ke saghar TuuTa
TuTna tha dil-e-nazuk ko na puchh
kab kahan kis liye kyun-kar TuuTa
siina dharti ka laraz uTTha hai
asman se koi aḳhtar TuuTa
jhuk gaya pa-e-butan par lekin
pattharon se na mira sar TuuTa
saḳht-jani miri tauba tauba
qatl karte the ki ḳhanjar TuuTa
ashk palkon se gira yuun jaise
ḳhushk Tahni se gul-e-tar TuuTa
ai ‘ziya’ ho ke riha zindan se
uḌne paaya bhi na tha par TuuTa
Leave a Reply