Wo buDha Ek KHwab Hai Aur Ek KHwab Mein Aata Rahta Hai

Zulfiqar Aadil

vo buḌha ik ḳhvab hai aur ik ḳhvab men aata rahta hai

is ke sar par an-dekha panchhi manDlata rahta hai

naTak ke kirdaron men kuchh sachche hain kuchh jhuTe hain

parde ke pichhe koi un ko samjhata rahta hai

basti men jab chak-gareban girya karte phirte hain

is mausam men ek rafu-gar hansta gaata rahta hai

har kirdar ke pichhe pichhe chal deta hai qissa-go

yunhi baiThe baiThe apna kaam baḌhata rahta hai

is din bhi jab basti men talvaren kam paḌ jaati hain

ek mudabbir ahan-gar zanjir banata rahta hai

avazon ki bhiiḌ men ik ḳhamosh musafir dhire se

na-manus dhunon men koi saaz bajata rahta hai

dekhne vaali ankhen hain aur dekh nahin patin kuchh bhi

is manzar men jaane kya kuchh aata jaata rahta hai

is dariya ki tah men ‘adil’ ek purani kashti hai

ik girdab musalsal us ka bojh baḌhata rahta hai