kal shaam yaad aaya mujhe!
aise ki jaise khvab tha
kone men angan ke mire
gul-chandni ka piida tha
main saari saari dopahar
saae men us ke khelti
phulon ko chhu kar bhagti
shakhon se mil kar jhulti
is ke tane men bisiyon!
lohe ki kilen thiin jadi
kilon ko mat chhuna kabhi
takid thi mujh ko yahi!
ye raaz mujh pe faash tha
is ped par aaseb thaa!
ik mard-e-kamil ne magar
aisa amal us par kiya
bahar vo aa sakta nahin!!
kilon men us ko jad diya
haan koi kilon ko agar
khinga uupar ki taraf!
aaseb bhi chhut jaega
phulon ko bhi kha jaega
patton pe bhi manDlayega
phir dekhte hi dekhte
ye ghar ka ghar jal jaega
is sahn-e-jism-o-jan men bhi
gul chandni ka ped hai!
sab phuul mere saath hain
patte mire hamraz hain
is ped ka saaya mujhe!
ab bhi bahut mahbub hai
is ke tane men aaj tak
aaseb vo mahsur hai
ye sochti huun aaj bhii!
kilon ko gar chheda kabhi
aaseb bhi chhut jaega
patton se kiya lena use
phulon se kiya matlab use
bas ghar mira jal jaega
kya ghar mira jal jaega?