Siraj Ajmali
phir suraj ne shahr pe apne qahr ka yuun aghaz kiya
jin jin ke lambe daman the un ka ifsha raaz kiya
zahr-e-nasihat tir-e-malamat dars-e-haqiqat sab ne diye
ek vahi tha jis ne meri har aadat par naaz kiya
naqd-e-ta.alluq ḳhuub kamaya lekin ḳharch are tauba
ye to batao kal ki ḳhatir kya kuchh pas-andaz kiya
shahr men is kaifiyat ka hai kaun muharrik kuchh to kaho
jis kaifiyat ne tum ko divanon men mumtaz kiya
ku-e-malamat ke bashinde tum ko sajda karte hain
kis ne is basti men aḳhir aise sar-afraz kiya
dehli men rahna hai agar to tarz-e-mir zaruri hai
us ne bhi to ishq kiya phir yaan rahna aghaz kiya
pahle uḌne ki davat di ta-hadd-e-imkan ‘siraj’
phir jaane kyuun ḳhud hi us ne qat.a par-e-parvaz kiya
Leave a Reply