Ahmad Ali Barqi Azmi
jab se men ne dekha hai ek khushnuma chehra
tab se hai nigahon men us ka chand sa chehra
surat aur sirat men imtiyaz mushkil hai
hai har ek chehre par ek dusra chehra
ek aur do hi men zehn tha paraganda
aa gaya kahan se ye ek tisra chehra
ba-vafa samajhta tha jis ko bevafa nikla
roz vo badalta hai ik na ik naya chehra
tha naqab men ab tak be-hijab jab dekha
faash ho gaya akhir us ka bad-numa chehra
duur se samajhte the jis ko chand ka tukda
jab qarib se dekha tha vo khurdura chehra
meri chashm-e-batin se kuchh nahin hai poshida
hai zaban-e-dil ‘barqi’ aina-numa chehra
Leave a Reply