ye paikar-e-jamal to itaab ke liye nahin
mire ḳhuda ye aadmi azaab ke liye nahin
tujhe hai shauq-e-bandagi bahisht ke ḳhayal se
magar miri ibadaten savab ke liye nahin
ye mujh se ehtiraz kyuun ye mujh se ijtinab kyuun
saval tujh se hai magar javab ke liye nahin
janab kyuun udaas hain janab kyuun malul hain
ye gham to hain mire liye janab ke liye nahin
jise pasand aa.ega vo toḌ lega shaḳh se
amaan apne baagh men gulab ke liye nahin
jo gham uTha chuka hai to unhen na ab shumar kar
ye muḳhtasar si zindagi hisab ke liye nahin
zamin pe ‘shahid’-e-hazin haqiqaten talash kar
ye dasht-e-zindagi kisi sarab ke liye nahin
Leave a Reply