abdul-hafiz-naeemi

Bahaar Ban Ke Khizan Ko Na Yun Dilasa De

bahar ban ke khizan ko na yuun dilasa de

nigahen pher le apni na khud ko dhoka de

masaf-e-zist hai bhar de lahu se jaam mira

na muskura ke mujhe saghar-e-tamanna de

khada hua huun sar-e-rah muntazir kab se

ki koi guzre to gham ka ye bojh uthva de

vo aankh thi ki badan ko jhulas gai qurbat

magar vo shola nahin ruuh ko jo garma de

hujum-e-gham vo raha umr bhar dar-e-dil par

khushi isi men rahi ye hujum-e-rasta de

likha hai kya mire chehre pe tu jo sharmaya

zaban se na bata aina hi dikhla de

main ladkhada sa gaya huun vafa ke vaade par

pakad ke haath mujhe ghar talak to pahuncha de

sukut-e-anjum-o-mah ne chhupa liya hai jise

jhuki nazar na kisi ko vo raaz batla de

har ek dard ka darman hai log kahte hain

magar vo dard ‘naimi’ jo khud masiha de

More Poems

Leave a Comment