main dil pe jabr karunga tujhe bhula dunga
marunga ḳhud bhi tujhe bhi kaḌi saza dunga
ye tirgi mire ghar ka hi kyuun muqaddar ho
main tere shahar ke saare diye bujha dunga
hava ka haath baTa.unga har tabahi men
hare shajar se parinde main ḳhud uḌa dunga
vafa karunga kisi sogvar chehre se
purani qabr pe katba naya saja dunga
isi ḳhayal men guzri hai sham-e-dard akasr
ki dard had se baḌhega to muskura dunga
tu asman ki surat hai gar paḌega kabhi
zamin huun main bhi magar tujh ko aasra dunga
baḌha rahi hain mire dukh nishaniyan teri
main tere ḳhat tiri tasvir tak jala dunga
bahut dinon se mira dil udaas hai ‘mohsin’
is aa.ine ko koi aks ab naya dunga
Leave a Reply