Dipak-Rag Hai Chahat Apni Kahe Sunaen Tumhein

dipak-rag hai chahat apni kaahe suna.en tumhen

ham to sulagte hi rahte hain kyuun sulga.en tumhen

tark-e-mohabbat tark-e-tamanna kar chukne ke ba.ad

ham pe ye mushkil aan paḌi hai kaise bhula.en tumhen

dil ke zaḳhm ka rang to shayad ankhon men bhar aa.e

ruuh ke zaḳhmon ki gahra.i kaise dikha.en tumhen

dard hamari mahrumi ka tum tab janoge

jab khane aa.egi chup ki saa.en saa.en tumhen

sannaTa jab tanha.i ke zahr men bujhta hai

vo ghaḌiyan kyunkar kaTti hain kaise bata.en tumhen

jin baton ne pyaar tumhara nafrat men badla

Dar lagta hai vo baten bhi bhuul na jaa.en tumhen

rang-birange giit tumhare hijr men haath aa.e

phir bhi ye kaise chahen ki saari umr na paa.en tumhen

uḌte panchhi Dhalte saa.e jaate pal aur ham

bairan shaam ka daman thaam ke roz bula.en tumhen

duur gagan par hansne vaale nirmal komal chand

be-kal man kahta hai aao haath laga.en tumhen

paas hamare aakar tum begana se kyuun ho

chaho to ham phir kuchh duuri par chhoḌ aa.en tumhen

anhoni ki chinta honi ka anya.e ‘nazar’

donon bairi hain jivan ke ham samjha.en tumhen