Tin Sharabi

zikr nahin ye farzanon ka

qissa hai ik divanon ka

masco, paris aur london men

dekhe main ne tiin sharabi

surḳh thiin ankhen ruuh gulabi

nashsha-e-mai ka taaj jabin par

fikr falak par paanv zamin par

be-ḳhabar apni laghzish-e-pa se

ba-ḳhabar apne ahd-e-vafa se

duḳhtar-e-raz ke dar ke bhikari

apne qalb o nazar ke shikari

pi lene ke baad bhi pyase

jaam ki surat chhalke chhalke

abr ki surat halke halke

masti ki talvar uthae

fasl-e-gul chehron pe khilae

qadam qadam par bahak rahe the

mahak rahe the chahak rahe the

ek ne shayad whiskey pi thi

dusre ne shampain ki botal

tisare ne vo pighli chandi

vodka ki sayyal hasina

vo shai jis ki tabish-e-ruḳh se

shishe ko aa jaae pasina

main ne un nazuk lamhon men

ruh-e-bashar ko uryan dekha

ahd-e-ḳhizan ka rang-e-paridan

rang-e-ahd-e-baharan dekha

zahir dekha pinhan dekha

zikr nahin ye farzanon ka

qissa hai ik divanon ka

raat ne apni kaali zaban se

ḳhuun shafaq ke dil ka chata

chaar taraf ḳhamoshi chhai

phail gaya har-su sannata

jannat-e-paris ke pahlu men

seine ki maujon ko niind aai

Dasne lagi mujh ko tanhai

mai-ḳhane men ja kar main ne

aag se dil ki pyaas bujhai

rind bahut the lekin vo sab

apne nashe men khoe hue the

jaag rahi thiin ankhen lekin

dil to sab ke soe hue the

koi nahin tha un men mera

men ye baitha soch raha tha

kab ye zalim raat kategi

kab vapas aaega savera

itne men ik qamat-e-raana

qadam qadam par phuul khilata

honton se maasum tabassum

ankhon se bijli barsata

mai-ḳhane men jhuum ke aaya

naaz o ada ke daam bichhata

aish o tarab ki mahbubayen

nashsha-e-mai ki doshizaen

rah gaiin apni ankhen mal kar

aai qayamat chaal men Dhal kar

sikkon ki jhankar pe gaati

sone ki talvar nachati

apne lahu men aap nahati

is nazuk lamhe men main ne

hirs-o-havas ko raqsan dekha

zad men nizam-e-zardari ki

ruh-e-bashar ko larzan dekha

majburi ko uryan dekha

zikr nahin ye farzanon ka

qissa hai ik divanon ka

gahre kohre ki lahron men

saara london Duub gaya tha

lamhon ki raushan ankhon men

shaam ka kajal phail chuka tha

raat ki niili devi jaagi

din ke devta ko niind aai

Dasne lagi mujh ko tanhai

mai-ḳhane men ja kar main ne

aag se dil ki pyaas bujhai

us mahfil men sab hi kuchh tha

saaqi bhi aur pir-e-mughan bhi

sahba ki aghosh ke paale

tiflak-e-masti rind-e-javan bhi

ghaza o rang ki maashuqaen

jin ki latafat shab bhar ki thi

itr aur resham ki minaen

jin ki sahba lab bhar ki thi

aaj ka sukh thaa, kal ka dukh tha

aaj ki asha, kal ki nirasha

hans hans kar gham dekh rahe the

in jhuti ḳhushiyon ka tamasha

na-ummidi ke kandhon par

rakkha tha ummid ka lasha

aaj vo le len, jo mil jaae

kal kya hoga kaun batae

aaj dilon ki shama jalaen

kal shayad ye raat na aae

aaj to mai ki kashti khe len

kal ye safina Duub na jaae

aaj labon ka bosa le len

maut ka bosa kal lena hai

aaj dilon ka qarz chuka len

kal to sab kuchh de dena hai

is nazuk lamhe men main ne

ruh-e-bashar ko viran dekha

atom-bomb ke ḳhauf ke aage

aql o ḳhirad ko hairan dekha

saare jahan ko larzan dekha

zikr nahin ye farzanon ka

qissa hai ik divanon ka

dosh-e-hava par tariki ne

zulfon ke ḳham khol diye the

masco ki ḳhamosh faza men

raat ki ankhon ke kajal ne

kitne jaadu ghol diye the

surḳh o siyah maḳhmal ke uupar

shaam ke sayon ko niind aai

Dasne lagi mujh ko tanhai

mai-ḳhane men ja kar main ne

aag se dil ki pyaas bujhai

ḳhush-fikron ka abr-e-baharan

jhuum pada tha mai-ḳhanon par

bada-kashon ka rangin jhurmut

tuut pada tha paimanon par

saaz ki lai men tezi aai

nashsha-e-mai ki angdai ne

apna hasin parcham lahraya

chappa chappa zarra zarra

qatra qatra raqs men aaya

naghmon ke be-tab bhanvar ko

lab ke tukde chuum rahe the

raqs ke bekal girdabon men

jism ke tufan ghuum rahe the

chehron ki raushan qindilen

banhon ki dil-kash mehraben

raag nazar ki ḳhamoshi ke

jumbish-e-mizhgan ki mizraben

is gardish men darham-barham

saara nizam-e-shams-o-qamar tha

pighal gae the chand aur suraj

mahfil-e-gul men raqs-e-sharar tha

raat ki peshani se jaise

taron ka jhumar tuut gaya ho

pir-e-falak ke haath se jaise

tasht-e-zamarrud chhut gaya ho

hire, nilam, laal aur moti

ḳhaak pe jaise bikhar rahe hain

jaise kisi ke barham gesu

bikhar bikhar kar sanvar rahe hon

nashsha-e-mai ke sar par lekin

aql o ḳhirad ka taaj dhara tha

duur se baitha baitha mujh ko

ek sharabi dekh raha tha

us ne hava men haath se apne

nanha sa ik bosa phenka

ik titli si udti aai

mere dil ke phuul ke uupar

kuchh kanpi aur kuchh manDlai

baith gai par jod ke donon

pyaar ke ras ko chuus ke utthi

aur miri janib se hava men

bosa ban kar phir lahrai

kuchh sharmai, kuchh itrai

aur sharabi mez se uth kar

raqs ke halqon se takrata

kashti ki surat chakrata

haath men apna jaam uthae

meri janib jhumta aaya

ḳhandan ḳhandan, nazan nazan

raqsan raqsan, pechan pechan

mauj-e-hava ko chumta aaya

meri zaban thi urdu, hindi

us ki zaban thi ruusi lekin

ek zaban thi aisi bhi jo

donon zabanon se pyari thi

donon jis ko bol rahe the

chand ishare chand tabassum

nazron ka ḳhamosh takallum

harf yahi the, lafz yahi the

shahad jo dil men ghol rahe the

hind ki masti, ruus ka naqsha

donon ne ik jaam banaya

aur hava men us ko nachaya

saath hamare sab rindon ne

apne dilon ko haath men le kar

mere vatan ka jaam uthaya

ab jo main ne mud kar dekha

jashn na tha ye divanon ka

gird hamare amn ki devi

giit ki huren saaz ki pariyan

naghme aur avaz ki ladiyan

paris ki bad-baḳht hasina

maghrur america ka sipahi

london ka badmast sharabi

aish o tarab ki mahbubaen

nashsha-e-mai ki doshizaen

ghaza o rang ki mashuqaen

itr aur resham ki minaen

‘hafiz’ aur ‘ghalib’ ki ghazlen

‘pushkin’ aur ‘tagore’ ki nazmen

kitne naaz aur kitni adaen

kitni shirin aur lailaen

kitne ranjhe, kitni hiren

kitne but, kitni tasviren

amn ki koshish aur tadbiren

mashriq o maghrib ki taqdiren

halqa bandhe naach rahi thiin

main ne is nazuk lamhe men

ruh-e-bashar ko nazan dekha

nashsha o raqs ke pech o ḳham men

pyaar ka jazba raqsan dekha

saare jahan ko ḳhandan dekha

zikr nahin ye farzanon ka

qissa hai ik divanon ka

Leave a Comment