Tauseef Tabassum
kya bata.un ki hai kis zulf ka sauda mujh ko
dud-e-har-sham.a gareban nazar aaya mujh ko
chand jo ubhra shab-e-gham mire dil men Duuba
bhigti raat ne kuchh aur jalaya mujh ko
haa.e kya kya mujhe betab rakha hai us ne
yaad karne pe bhi jo yaad na aaya mujh ko
ab to sanson ke tamavvuj se bhi ji Darta hai
zindagi tu ne ye kis ghaaT utara mujh ko
the miri pusht pe aqdar ke Dhalte suraj
ban gaya rah-numa apna hi saaya mujh ko
raah be-samt hai uftad hai manzil apni
ḳhak-e-sahra huun uḌata hai bagula mujh ko
pahle divar uTha.i thi ki ḳhud ko dekhun
ab yahan koi nahin dekhne vaala mujh ko
le uḌi mujh ko mire zehn ki ḳhushbu tausif
tu ne kya soch ke zanjir kiya tha mujh ko
Leave a Reply