Mumtaz Ahmad Khan Khushtar
dil-e-na-subur ko phir vahi but-e-bevafa ki talash hai
gham-e-ibtida to uTha chuka gham-e-intiha ki talash hai
kisi be-vafa ka gila bhi hai kisi ba-vafa ki talash hai
ye fareb-e-shauq ki dil ko phir kisi ashna ki talash hai
tira gham hi gham rahe umr-bhar tire gham men ḳhud ko fana karun
mujhe ibtida-e-shu.ur se isi intiha ki talash hai
ye vo jins hai ki jahan men jo na bik sake jo na mil sake
tujhe kyuun vafa ka junun hai tujhe kyuun vafa ki talash hai
jo mile bhi ḳhizr to ab kahun ki salam ab-e-hayat ko
na vo dil ko zauq-e-talab raha na vo rahnuma ki talash hai
dil na-saza ko ye chahta huun ki chaah men kahin Daal duun
use hai gunah ki justuju to mujhe saza ki talash hai
na.e hausle na.e valvale miri justuju men mudam hain
mujhe intiha-e-talash men bhi to ibtida ki talash hai
tire is ilaaj men dam nahin tiri bas ka rog ye gham nahin
mire dard ke liye charagar tujhe kyuun dava ki talash hai
mujhe justuju hai junun ki mujhe be-ḳhudi ki hai aarzu
mire karvan-e-hayat ko kisi rahnuma ki talash hai
tire saath hai tire paas hai na juda samajh vo juda nahin
ye ḳhudi ka parda uTha ke dekh agar haan ḳhuda ki talash hai
ye hai hashr-e-‘ḳhushtar’-e-na-tavan yahan nafsi-nafsi ka hai saman
mujhe ab hujum-e-gunah men shah-e-dosara ki talash hai
Leave a Reply